ရွှေညာသား: ရိုးရှင်းလွယ်ကူ မုန့်ဟင်းခါး

အားလုံးမင်္ဂလာပါဗျာ.....ဘလော့ထဲမရောက်တာလည်း တော်တော်လေးကြာသွားပြီ။ ကိုဗစ်ကြီးမွှေနေတုန်း အစားအသောက်တွေလည်း တတ်သမျှအကုန် တမျိုးပြီးတစ်မျိုး မရိုးရအောင်ချက်စားနေဖြစ်တော့တာပဲ။ အခုမုန့်ဟင်းခါးလည်း ကိုဗစ်နည်းနည်းစဲသွားတော့ ကျောင်းထဲကစျေးမှာ မုန့်ဖတ်ဝယ်ပြီး အဆောင်အောက်က ငှက်ပျောတောက ငှက်ပျောပင် အနုကိုခုတ်ပြီး ပဲဝါလေးကို ပဲမှုန့် နဲ့ ငှက်ပျောအူ များများ ထည့်ပြီး မုန့်ဟင်းခါးချက်စားတုန်းကသိမ်းထားတဲ့ပုံလေးတွေပါ။ မစားရတာကြာတော့ အဲ့ဒီနေ့က တနေကုန် ထမင်းလွတ်တွယ်လိုက်တယ်။ အဆောင်မှာလည်းစား ဘေးအခန်းက မြန်မာညီလေးတွေကိုလည်း တစ်ပန်းကန်စီ ဝေစားနဲ့ ကုသိုလ်လည်းရ ဝမ်းလည်းဝပေါ့။ ကိုယ့်စေတနာကပဲ အကျိုးပေးတယ်ဆိုရမလား အစားအစာ သူများကိုပေးဝေစားတော့ ကိုယ့်ကိုလည်း ကျွေးမည့်သူကမရှားဘူး။ ဌာနမှာဆို အမြဲတမ်းလိုလိုစားရတာ။

ပဲဝါလေး နဲ့ ပဲမှုန့် ငှက်ပျောအူ မုန့်ဟင်းခါး

ဒီပုံက ဌာနမှာ နေ့လယ်စာ မစားခင်မှတ်တမ်းပြုထားတာ

ဘူတန်က မာစတာတက်တဲ့ကျောင်းသူကိုလည်း မြန်မာအစားအစာမိတ်ဆက်ရင်းနဲ့သူ့ကိုပါကျွေးလိုက်တယ်

သူကသက်သတ်လွတ်သမားမို့ ဘဲဥကအလုံးလိုက်ပြုတ်ထည့်ထားတာလို့ ဟင်းရည်ကနင်စားလို့ဖြစ်တယ်ဆိုပြီး ထည့်ကျွေးတာ အညာသားလက်ရာမှာ လျှာလည်သွားဟန်တူရဲ့ ချက်နည်းမေးတော့တာပဲ။ ဟိုတစ်ခါ တို့ဟူးသုပ်လုပ်တုန်းကလည်း သူ့ကိုကျွေးတာ သတိရတိုင်း တို့ဟူးသုပ်လုပ်ခိုင်းနေလို့။ ဒီတစ်ခါဆို ငါက အသားထည့်သုပ်မှာလို့ပြောမှ ထပ်မခိုင်းတော့တာ။ မုန့်ဟင်းခါးကိုတော့ တော်တော်လေး သဘောကျတယ်ထင်တယ် ဟင်းရည်နဲ့မုန့်ဖတ်ကို သူစိတ်ကြိုက်ပြင်စားခိုင်းလိုက်တာ ခေါင်းကိုမဖော်ဘူး။ ကိုယ့်အတွက်ကတော့ ကုသိုလ်ရတာပေါ့လေ။

နောက်မှ တခြားဟင်းလေးတွေ ထပ်တင်ပါအုံးမယ်ဗျာ။ အားလုံးကိုယ်စိတ်နှစ်ဖြာကျန်းမာချမ်းသာပြီး ကိုဗစ်ကပ်ရောဂါဘေးမှ အမြန်ဆုံးကင်းဝေးကြပါစေလို့ ရွှေညာသားက မေတ္တာပို့သပါတယ်။

အားပေးမှုကိုကျေးဇူးတင်လျက်

ရွှေညာသား

၁၃၈၂ ခုနှစ် သီတင်းကျွတ်လပြည့်ကျော် (၃) ရက်

၃-၁၁-၂၀၂၀

ခွန်အားရှိသောစာ

အခက်အခဲတွေ ဘယ်လောက်ပဲကြီးမားပါစေ သင်အရှုံးမပေးမချင်း ရှုံးနိမ့်သူမဟုတ်သေးပါဘူး။ စိတ်ဓာတ်ကျတာဟာ ရှုံးနိမ့်ခြင်းကို ဒူးထောက်လိုက်ခြင်းပဲ။ မိမိဘာဖြစ်ချင်နေသလဲ စိတ်ကူးအမြော်အမြင်ထားရှိပါ သတ္တိရှိပါ မိမိ၏စိတ်ကူးနှင့်ပတ်သက်၍ မည်သူကမျှ အဝေဖန်မခံပါနှင့် လုပ်စရာရှိသည်ကို ဆက်လုပ်သွားပါ။ ပြိုင်ပွဲတိုင်းတွင် အောင်နိုင်မှုများရှိသကဲ့သို့ ရှုံးနိမ့်မှုများလည်းရှိတတ်သည်။ ရှုံးနိမ့်မှုများအတွက် မျက်နှာပျက်စရာမဟုတ်ပေ သို့ရာတွင် သင့်အနေဖြင့် လုပ်မိခဲ့သောအမှားကို နှစ်ကြိမ်ထပ်၍မလုပ်မိပါစေနှင့်။

ထိပ်ဆုံးသို့