အညာသား လက်ရာ ကင်မ်ချီ
ကြုံတဲ့အခါစားတာမျိုးလောက်ပဲရှိတယ်။တခါတလေယူကျူ့ကအစားအသောက်ပြုလုပ်တဲ့ဗွီဒီယိုတွေမှာ
ကင်မ်ချီလုပ်နည်းကိုဝင်ကြည့်ဖြစ်တယ်။ဒါပေမဲ့စမ်းပြီးလုပ်ကြည့်ဖို့တော့စိတ်ကူးမရှိခဲ့ဘူး။အမှန်အတိုင်းပြောရရင်ကိုယ့်ဆီကမုန့်ညှင်းချဉ်ကိုပဲလွယ်လွယ်လုပ်စားဖြစ်တာများတယ်။ဒီတစ်ခါတော့ကွန်ပျူတာဌာနမှာ
တက်နေတဲ့ညီမတွေကကင်မ်ချီလုပ်စားတာကိုသူတို့မိုင်ဒေးမှာတင်တာတွေ့လို့တစ်ဗူးလောက်ပေးပါလို့ စပြီး
ကွန်မန့်ဝင်ရေးရင်းကသူတို့ကတကယ်ထင်ပြီးဗူးလိုက်တော့မရှိတော့ဘူးဆရာစားချင်တယ်ဆိုနည်းနည်းခွဲပေးမယ်ဆိုပြီးကျောင်းအားချိန်ညနေပိုင်းဌာနထိလာပေးသွားတာကနေမြန်မာမိတ်ကင်မ်ချီကိုစားဖူးပြီးကိုယ်တိုင်
ဖန်တီးကြည့်ချင်စိတ်ဖြစ်တာနဲ့စမ်းလုပ်ကြည့်တာပါ။
ချိုချဉ်အရသာလေးနဲ့ ထမင်းမြိန်တဲ့ ကင်မ်ချီ
ထားပြီးမုန့်လာဥနီ၊မုန်လာဥဖြူ၊ကြက်သွန်မြိတ်၊တွေကိုသင့်တော်တဲ့အရွယ်အစားရအောင်ဖြတ်တောက်ပြင်ဆင်ထားပါတယ်။အနှစ်အတွက်ကိုတော့ပြောင်းဖူးမှုန့်အနည်းငယ်ကိုရေဖျော်၍ပျစ်လာအောင်ကျိုပြီး အအေးခံထားပါတယ်။ကြက်သွန်ဖြူ၊ချင်းအနည်းငယ်ညက်အောင်ထောင်း၊အရောင်အတွက်ငရုတ်သီးအနှစ်
မရှိလို့ မုန်လာဥနီအနည်းငယ်ကိုခြစ်ပြီးအနီရောင်ရအောင်ထည့်ပါတယ်။ပန်းသီးတစ်လုံးကိုလည်းခြစ်ပြီးထည့်ပါတယ်။ကျိုထားတဲ့ပြောင်းဖူးကော်အနှစ်ထဲကိုထောင်းထားတဲ့ကြက်သွန်ဖြူ၊ချင်း၊မုန့်လာဥနီခြစ်ထားတာရယ်
ပန်းသီးခြစ်ထားတာရယ်သကြားနဲ့ဆားထည့်ပြီးသမအောင်မွှေပါတယ်။အနှစ်အဆင်သင့်ဖြစ်တဲ့အခါဆားနယ်ထားတဲ့မုန့်ညှင်းဖြူကိုရေဆေး၊လှီးဖြတ်ထားတဲ့ကြက်သွန်မြိတ်၊မုန်လာဥဖြူနီနဲ့ကြက်သွန်ဖြူမြိတ်လိုမျိုးနာမည်သေချာမသိထိုင်းဆန်ခေါက်ဆွဲကြော်မှာသုံးတဲ့အရွက်တစ်စည်းပါဖြတ်ထည့်ပြီးသမအောင်မွှေပါတယ်၊
အစပ်အရသာအတွက်ငရုတ်သီးလှော်မှုန့်အနည်းငယ်ထည့်ပါတယ်။အားလုံးသမသွားတဲ့အခါအရသာအနေအထားမြည်းပြီးလေလုံတဲ့ဖန်ဗူးသို့မဟုတ်ပလပ်စတစ်ဗူးထဲကိုသိပ်ထည့်ပြီးအခန်းအပူချိန်မှာပဲနှစ်ည
ထားပါတယ်။တစ်ညထားပြီးချိန်မှာကိုပဲအနံ့ကမွှေးလာပါပြီ။ကြက်သွန်ဖြူမြိတ်ကအနံ့ပိုထွက်တယ်ထင်ပါတယ်၊ ကင်မ်ချီနံ့စစ်စစ်မဟုတ်ပေမဲ့တော်တော်လေးဆွဲဆောင်မှုရှိပါတယ်။နှစ်ညထားပြီးချိန်မှာစားလို့ရပါပြီ
ကျနော်ကတော့ဗူးကိုလေလုံအောင်ပိတ်ပြီးဌာနကရေခဲသေတ္တာထဲမှာထည့်ထားပါတယ်။အဲ့ဒီအချိန်ကစပြီး
ကိုယ်တိုင်လုပ်တဲ့ကင်မ်ချီကိုမနားတမ်းအားပေးတာနှစ်ပတ်လောက်စားလိုက်ရပါတယ်။ကင်မ်ချီပေးတဲ့
ညီမလေးတွေကိုလည်းကိုယ့်လက်ရာပြန်မြည်းခိုင်းတော့သူတို့လုပ်တာထက်ပိုစားကောင်းတယ်လို့ချီးကျူး
ကြတယ်။ဘာပဲဖြစ်ဖြစ်လေကိုယ်လက်ရာကိုကောင်းတယ်ပြောရင်ချက်ရသူတိုင်းကျေနပ်တာပါပဲ။
ကြက်သားကြိတ်သားနဲ့ကင်မ်ချီ ချဉ်စပ်ကြော်
ခေါက်ဆွဲသုပ်တဲ့အခါကင်မ်ချီကိုအချဉ်အဖြစ်တွဲစားတယ်။ကြက်ဥရယ်အာလူးရယ်ကင်မ်ချီရယ်ရောပြီး
တခါကြော်စားတယ်။အနံ့သင်းသင်းလေးနဲ့ချိုချဉ်အရသာကင်မ်ချီကတစ်မျိုးစားလို့ကောင်းပါတယ်။နောက်လည်းအချိန်ရရင်လုပ်ပြီးဌာနကရေခဲသေတ္တာထဲမှာသိမ်းထားအုံးမယ်။ငံပြာရည်ချက်တစ်ဗူးလောက်နဲ့ဆို
စားဖြစ်တယ်။Labမှာညစားစားဖြစ်တာများတော့နေ့လယ်ကတည်းကထမင်းဝယ်ထားလိုက်ရင်ဟင်းအတွက်
ပူစရာမလိုတော့ဘူး။
ကြက်ဥ အာလူး နဲ့ ကင်မ်ချီ ကြော်
ချိုချဉ် ဆိမ့်လေးနဲ့ ထမင်းမြိန်တဲ့ ကင်မ်ချီ ဟင်းတခွက်
စာတွေနဲ့စိတ်ဖိစီးတဲ့အခါကျနော့်အတွက်အပန်းဖြေစရာတစ်ခုကတော့အခုလိုမျိုးဟင်းခွက်လေးတွေဖန်တီး
ချက်ပြုတ်ရတာပါပဲ။စာဖတ်ခြင်းတရားနာခြင်းအိပ်စက်ခြင်းတွေကလည်းစိတ်ဖိစီးမှုပြေပျောက်စေသလိုဝါသနာပါရာအစားအသောက်တခုခုကိုကိုယ်တိုင်ချက်ပြုတ်ရခြင်းကလည်းအပမ်းပြေပါတယ်။
လာလည်ကြတဲ့အွန်လိုင်းမိတ်ဆွေညီအစ်ကိုမောင်နှမများအားလုံးကိုယ်စိတ်နှစ်ဖြာကျန်းမာချမ်းသာကြပါစေလို့ရွှေညာသားကဆုတောင်းမေတ္တာပို့သပါတယ်။လာရောက်လည်ပတ်တဲ့အတွက်လည်းကျေးဇူးတင်ပါတယ်
အားပေးမှုကိုအစဉ်လေးစားလျက်
ရွှေညာသား
၁၃၈၁ ခုနှစ် တန်ဆောင်မုန်းလဆန်း (၇) ရက်
၂၀၁၉ ခု နိုဝင်ဘာလ ၃ ရက်
