ဒီတပတ်ကျောင်းပိတ်ရက်မှာ ရွှေညာသားလေး ရွာကိုခဏပြန်ဖြစ်တယ်။ ခဏဆို တကယ့်ကိုခဏပါပဲ။ ညရောက် မနက်ပြန်ပဲ။ ဆွေမျိုးတွေအိမ်တောင် စေ့အောင်မလည်ခဲ့ရပါဘူး။ ဦးကြီး ဒွေးလေးတွေက မင်းဟာ လာတဲ့အခါလေးများ အေးအေးဆေးဆေးတော့နေပါအုံးပေါ့တဲ့။ သူတို့တွေကတော့ သူတို့အတွေးနဲ့သူတို့ပြောကြတာပေါ့ဗျာ။ ဒါပေမဲ့ ကိုယ့်ဝမ်းနာ ကိုယ်သာသိ ဆိုသလိုပဲလေ ကိုယ်ကအဲ့လိုနေလို့ရအောင် လွတ်လပ်တာမှမဟုတ်တာနော်။ ဒီလိုပဲ သူတို့ကို နားလည်အောင်ပြောပြပြီး ပြန်ခဲ့ပါတယ်။
ရွှေညာသားလေးတို့ ရွာမှာ တောင်သူလယ်သမား အများစုနေထိုင်တာဆိုတော့ လယ်ယာစိုက်ပျိုးရေးလုပ်ငန်းက သူတို့တွေအတွက် အရေးပါလှတယ်။ မိရိုးဖလာ လုပ်ကိုင်စားသောက်လာတဲ့ လုပ်ငန်းဆိုတော့လည်း ပင်ပမ်းပေမဲ့ လုပ်စားနေကြရတာပါပဲ။ ဒီကြားထဲမှာ မိုးလေ၀သက မမှန်တော့ ပင်ပမ်းရကျိုးမနပ်ဘူးပေါ့ဗျာ။ အခုနှစ်ဆိုလည်း မိုးက အတော်လေး ခေါင်တာ။ အရင်နှစ်တွေက ဒီအချိန်ဆို လယ်တွေစိုက်နေပြီတဲ့။ အခုနှစ်တော့ လယ်စိုက်ဖို့ဝေးလို့ ပျိုးထောင်တာတောင် အပင်မပေါက်နိုင်ဘူးတဲ့လေ။ သူတို့တွေရဲ့ ရင်ဖွင့်သံတွေကို ကြားရတော့လည်း စိတ်မကောင်းဖြစ်မိတယ်။ ရွှေညာသားလေးလည်း ဒီဘ၀တွေကိုဖြတ်သန်းလာရတာဆိုတော့ သူတို့ခံစားချက်ကို နားလည်ပေးနိုင်တယ်လေ။ ရွှေညာသားလေး ရွာမှတုန်းက အခုလိုမိုးဦးကျနောက်ကျတဲ့ နှစ်ဆိုရင် ရွာအနောက်ဘက်က တောင်ရိုးတွေပေါ်ကို ဦးလေးတွေ အဒေါ်တွေနဲ့ နွားစာရှာခဲ့ဖူးတယ်။ မိုးခေါင်ပြီဆိုရင် လူစာထက် နွားစာက တော်တော်လေး ခက်ခဲတာ။ လူစာက သူများဆီမှာ ကူးပြီး(ချေး) စားလို့ရသေးတယ်။ နွားစာကျတော့ အဲ့ဒီလိုမရဘူးလေ။
မိုးကောင်းတဲ့နှစ်ဆိုရင်တော့ ၀ါဆိုဝါခေါင်ဆိုရင် ပြောင်းဖူးတွေလည်းပေါ်နေပြီ။ ရွာမြောက်ဘက်က လယ်ကွင်းပြင်မှာလည်း ရေတွေတဖွေးဖွေးနဲ့ ပျိုးနှုတ်ကောက်စိုက် လယ်ထွန် စတဲ့ မိုးတွင်းပန်းချီကားချပ်ကြီးက အသက်ဝင်စွာလှုပ်ရှားနေပြီပေါ့။ ဒါပေမဲ့ ဒီနှစ်ရွာပြန်တော့ ဒီပန်းချီကားချပ်ကြီးကို မြင်ရမည့်အစား ပတ်ကြားအက်တွေမပျောက်သေးတဲ့ လယ်ကွက်တွေနဲ့ အရွက်တွေခြောက်နေတဲ့ ပြောင်းဖူးခင်းတွေ မိုးမျှော်နေတဲ့ ၀ါဖျော့ဖျော့ စပါးပျိုးခင်းတွေကိုသာ မြင်ခဲ့ရတယ်။
မိုးတိမ်တောင်တွေကတော့ ညနေစောင်းရင် အနောက်တောင်ဆီက တက်တက်လာတာပဲတဲ့။ ဒါပေမဲ့ ညိုသာညိုတယ် မရွာတဲ့မိုးဖြစ်နေတာ ကြာပြီတဲ့လေ။ တွေ့တဲ့သူကို လယ်တွေစိုက်ရပြီလား၊ နှမ်းခင်းရော ဘယ်နှယ့်နေတုန်း စသဖြင့် မေးကြည့်တော့ လယ်ကတော့ကွာ ဒီနှစ်မျိုးဆုံးလောက်ပါတယ်။ နှမ်းကတော့ မျိုးလေးလောက် ပြန်ရလိမ့်အုံးမလားလို့ပဲ စတဲ့အားမရှိတဲ့အဖြေလေးတွေပေးကြတယ်။ နောက်ပြီးပြောသေးတယ် မင်းတို့ပညာတတ်တွေပဲ ဟန်ကျတယ် ဘယ်တော့မှမိုးမခေါင်ဘူးတဲ့။ မိုးတော့မခေါင်ဘူးပေါ့ဦးလေးရယ် ဒါပေမဲ့ ကိုယ့်ရပ်ကိုယ်ဒေသမှာ မိုးခေါင်တယ်ဆိုတော့ စိတ်မကောင်းဖြစ်မိတာပေါ့။ ရွှေညာသားလေးလည်း တောင်သူလယ်သမားဘ၀က ဆင်းသက်လာသူတစ်ယောက်မို့ ကိုယ်က အဆင်ပြေပြေ စားသောက်နေရပေမဲ့ ကိုယ့်ဒေသ ကိုယ်ရပ်ရွာမှာ မိုးလေးဝသမကောင်းဘူးဆိုတော့ ဘယ်လိုလုပ်ပြီး ၀မ်းသာနိုင်ပါ့မလဲလေ။
ချောင်းထဲကိုရေချိုး ဆင်းရင်း ရွာမြောက်ဘက်က ခြောက်သွေ့နေတဲ့ လယ်ကွင်းပြင်တွေနဲ့ တိမ်တွေခမောက်ဆောင်းနေတဲ့ ပုပ္ပားတောင်ကြီးရဲ့ ပုံလေးတွေကို တင်ပေးပါအုံးမယ်။ ပုပ္ပားတောင်ကြီးလည်း တိမ်တွေ ခမောက်ဆောင်းနေပေမဲ့ မိုးမရွာတော့ဘူး။ အရင်တုန်းကဆိုရင် ပုပ္ပားတောင်ကြီးဟာ ကျွန်တော်တို့ရွာလေးရဲ့ မိုးလေ၀သအချက်ပြ သင်္ကေတတစ်ခုပါ။ အခုတော့ သူလည်း သူ့တာဝန်ကိုပုံမှန်အတိုင်း ထမ်းဆောင်နေပေမဲ့ မိုးတွေကတော့ ညိုသာညို ပြိုမလာခဲ့ပါဘူး။ မိုးမရွာလို့ စိတ်အားငယ်နေတဲ့ ရွာသူရွာသား ဦးကြီးဦးလေးတွေရဲ့ မျက်နှာတွေကို မြင်ရလို့ ရွှေညာသားလေးလည်း စိတ်မကောင်းစွာနဲ့ နှုတ်ဆက်ပြီး အလုပ်ဌာနရှိရာဆီသို့ ပြန်လာခဲ့ပါတယ်။ စိတ်ထဲမှာတော့ မိုးတွေမြန်မြန် ရွာသွန်းပါစေလို့သာ ဆုတောင်းနေမိပါတယ်။
