ဒီတစ်ခါတော့ ဈေးထဲမှာ ချဉ်ပေါင်သီးတွေ့လို့ အညာချက်လေး ချက်စားဖြစ်တယ်။ အမေ့အိမ်အလွမ်းပြေဆိုလည်းမမှားပါဘူး။ငယ်ငယ်တုန်းကချဉ်ပေါင်သီးဟင်းစားရပါများလို့အသံကြားလျှင် ပါးကျိန်းလို့ ချဉ်ပေါင်သီး ဟင်းနီတာရဲကိုနှစ်ပေါင်းများစွာစားခဲ့ရပေမဲ့ သူနဲ့ကင်းကွာလာတာအချိန်ကြာပြီးပြန်တွေ့တဲ့အချိန်မှာတော့
သူ့အရသာကတစ်မျိုးနဲ့စားကောင်းနေတယ်။ချဉ်ပေါင်သီးဝယ်ပြီးတော့ငရုတ်သီးစိမ်းကိုပါထပ်ဝယ်လိုက်တယ်။ချဉ်ပေါင်သီးဟင်းချဉ်ချဉ်လေးကိုငရုတ်သီးစိမ်းငါးပိထောင်စပ်စပ်နဲ့တွဲဖက်စားဖို့ပါ။အချဉ်ထိန်းဖို့အတွက်ရုံးပတီသီးနည်းနည်းထည့်ချက်လိုက်တယ်။ကျနော်အတွက်တော့ အဲ့ဒီနေ့ညနေစာထမင်းပွဲဟာ
တစ်ယောက်ထဲဖြစ်ပေမဲ့စိတ်ထဲမှာတော့ငယ်ငယ်တုန်းကအိမ်မှာမိသားစုသိုက်သိုက်ဝန်းဝန်းနဲ့စားခဲ့ရသလိုပါပဲ
ထမင်းစားရင်းအိမ်ကအမေနဲ့အဖေကိုသတိရသလိုအစ်ကိုနဲ့ညီတွေကိုလည်းလွမ်းမိတယ်။ချဉ်ပေါင်သီးဟင်း
နီနီရဲရဲတစ်ခွက်နဲ့ငရုတ်သီးထောင်းကိုတွဲဖက်ပြီးမိသားစုတွေစည်းစည်းလုံးလုံးနဲ့ဝိုင်းဖွဲ့စားသောက်ခဲ့ကြတာ
တစ်ရက်မက တနှစ်မက ချဉ်ပေါင်သီးပေါ်ချိန်တိုင်းပါပဲ။ချဉ်ပေါင်သီးအစိုကုန်ခါနီးရင်အခြောက်လှန်းပြီး
နွေရာသီစားဖို့ ရေအိုးဟောင်းနဲ့ထည့်လှောင်ထားတတ်ကြသေးတာ။အစိုပြီးတော့အခြောက်ချဉ်ပေါင်သီးကို
ထန်တျာတေနေတော့တာ။ဘယ်အိမ်မေးမေးချဉ်ပေါင်သီးဟင်းချဉ်ပေါင်သီးထောင်းနဲ့အသံကြားတာနဲ့
ပါးတွေသွားတွေကျိန်းကုန်တာ။ဒါပေမဲ့လေးငါးဆယ်နှစ်လောက်ချဉ်ပေါင်သီးဟင်းနဲ့ကင်းကွာသွားတော့လည်း
အချဉ်အရသာသည်ပင်လျှင်တမ်းတစွဲမက်စရာဟင်းတခွက်ပြန်ဖြစ်နေပြန်တယ်။
ချဉ်ပေါင်သီးဟင်း အညာချက်
ချဉ်ပေါင်သီးဟင်းလေးကိုတစ်ယောက်ထဲစားရင်းအတွေးနဲ့ငယ်ဘဝကိုပြန်ရောက်သွားခဲ့တယ်။
အမြင်မလှပေမဲ့ အရသာရှိတဲ့ ချဉ်ပေါင်သီးဟင်းတခွက်ပါ
မိုးမျှော်ငရုတ်သီးစိမ်းကို ဒယ်အိုးပူတိုက်ပြီး ကြက်သွန်ဖြူ ငါးပိမီးဖုတ်နဲ့ ရောထောင်းထားတာ
ချဉ်ပေါင်သီးဟင်းချဉ်ချဉ်လေးနဲ့လိုက်ဖက်တဲ့ဟင်းစပ်ပါ။
နောက်တစ်နေ့ကျတော့ကျန်တဲ့ချဉ်ပေါင်သီးဟင်းထဲကို မုံလာဥနည်းနည်း ပဲသီးခရမ်းသီးထပ်ရောပြီး ချဉ်ရည်သောက်လေးပြောင်းချက်စားတယ်။တခါတည်းနဲ့အဝပါပဲ။
အားလုံးကိုယ်စိတ်နှစ်ဖြာကျန်းမာချမ်းသာပြီးကောင်းကျိုးလိုရာဆန္ဒပြည့်ဝကြပါစေ။လာရောက်လည်ပတ်ကြတဲ့အတွက်လည်းကျေးဇူးတင်ပါတယ်။
အားပေမှုကိုအစဉ်လေးစားလျက်
ရွှေညာသား
၁၆-၁၂-၂၁၀၉
