အညာသား လ/ထ ကထိက ဖြစ်ပြီ

 

ဒီစာရင်းထဲမှာ အညာသားလည်းပါတယ်ဗျ...နံပတ်စဉ်ဘယ်လောက်ဖြစ်မလဲ :)

ကျောင်းနေစအရွယ်ကစပြီးအဖေအမေရဲ့ကျေးဇူးအစ်ကိုတွေညီတွေရဲ့နားလည်အနစ်နာခံမှုတွေနဲ့
ကျောင်းသားဘ၀ကိုရုန်းကန်ရင်းနဲ့အလယ်တန်းအထက်တန်းတွေပြီးလို့တက္ကသိုလ်မှဘွဲ့လေးတစ်ခု
ပိုင်ဆိုင်ခဲ့တယ်။

တက္ကသိုလ်ကျောင်းသားဘ၀မှာအထက်တန်းကျောင်းသားဘ၀ထက်မျက်စေ့ပွင့်နားပွင့်ဖြစ်လာခဲ့ပြီး
ဘ၀ရှေ့ရေးဆိုတာတွေပါတွေးတတ်စဉ်းစားတတ်လာခဲ့တယ်။ဆယ်တန်းအထိကတော့အဖေနဲ့အမေ
ပညာမတတ်လို့ဆင်းဆင်းရဲရဲလုပ်ကိုင်စားသောက်နေရတာငါ့သားတို့ကိုပညာတတ်တွေဖြစ်စေချင်တာ
အမေတို့လိုမဆင်းရဲအောင်ဆိုတဲ့အမေ့ရဲ့ဆုံးမစကားကြောင့်ငါဆယ်တန်းအောင်မှဖြစ်မယ်ဆိုတဲ့စိတ်က
လွဲပြီးတခြားကျယ်ကျယ်ပြန့်ပြန့်အတွေးမရှိခဲ့ပါဘူး။

တက္ကသိုလ်မှာပညာဆက်သင်လို့ပထမနှစ်အပြီးမှာပဲဆရာဆရာမတွေနဲ့သွန်သင်ဆုံးမမှုတွေနဲ့အတူ
ဘ၀ရှေ့ဆက်လျှောက်ရမည့်လမ်းအတွက်မျှော်လင့်ချက်ရောင်ခြည်တွေသန်းခဲ့ရတယ်။ပထမတုန်းက
တော့အဝေးသင်နဲ့ဘွဲ့ယူပြီးအဖေနဲ့အမေကိုကူရင်းတဖက်တလမ်းက၀င်ငွေရှာ၊နောက်ကညီငယ်တွေ
ကျောင်းတက်ဖို့တတ်အားသရွေ့ထောက်ပံ့မယ်စိတ်ကူးခဲ့တာ။ပထမနှစ်တက်ပြီးတော့ဒုတိယနှစ်ကို
ဆက်တက်ရိုးရိုးအေးအေးနေတတ်တဲ့ကျနော့်ကိုစာဘက်မှာအာရုံစိုက်မှန်းသိတော့ဂုဏ်ထူးတန်းဝင်
အောင်ကြိုးစားဖို့တိုက်တွန်းရင်းရနိုင့်မည့်အခွင့်အလမ်းတွေပြောပြတော့စာကိုဖိကြိုးစားရင်းဂုဏ်ထူးတန်း
ဝင်ခဲ့တော့တခြားသူငယ်ချင်းတွေထက်တစ်နှစ်ပိုတက်ရပြီးဂုဏ်ထူးတန်းဘွဲ့ရခဲ့တယ်။

ဂုဏ်ထူးတန်းပြီးတော့မဟာတန်းကိုဆက်တက်ဖို့အဖေနဲ့အမေကလည်းအားပေးဆရာဆရာမတွေက
လည်းတိုက်တွန်းနဲ့ဆိုတော့မတက်တော့ဘူးလို့ဆုံးဖြတ်ထားတဲ့မဟာတန်းကိုကျောင်းနှစ်ပတ်လောက်
နောက်ကျပြီးမှအပ်ဖြစ်တယ်။တိုက်တိုက်ဆိုင်ဆိုင်ပဲကျောင်းအပ်ပြီးအတန်းစတက်တဲ့နေ့မှာရာထူးခေါ်
စာထွက်တယ်။အသက်နှစ်ဆယ့်ငါးနှစ်အောက်ဂုဏ်ထူးတန်းဘွဲ့ရယောကျာ်းလေးများလျှောက်ထားနိုင်
သည်ဆိုတော့ဆရာဆရာမတွေက၀င်လျှောက်ဖို့အကြံပေး၊အဖေနဲ့အမေကလည်းလျှောက်ခိုင်းတော့
ကျောင်းတဖက်နဲ့ပဲလျှောက်လွှာတင်ပြီးဝင်ခွင့်စာမေးပွဲအတွက်ပြင်ဆင်ရတယ်။စာမေးပွဲဖြေပြီးတော့
ပုံမှန်အတန်းပြန်တက်ရင်းအောင်စာရင်းထွက်တဲ့နေမှာသရုပ်ပြရာထူးအတွက်အရွေးခံခဲ့တယ်။

သရုပ်ပြဖြစ်ပြီးတော့ရန်ကုန်တက္ကသိုလ်မှာမွမ်းမံတစ်လသင်ပညာရေးဝန်ကြီးကိုယ်တိုင်လူတွေ့စစ်ဆေး
ပြီးတော့မန္တလေးတက္ကသိုလ်မှာတပတ်ကျော်နေ၊အဲ့ဒီကတဆင့်ပြင်ဦးလွင်စစ်တက္ကသိုလ်ထဲကိုရုရှားဘာသာ
စကားသင်ဖို့ပို့တော့မှကျနော်တို့အဖွဲ့ကိုရုရှားလွှတ်ဖို့အစီအစဉ်နဲ့ခေါ်မှန်းကောင်းကောင်းသဘောပေါက်ခဲ့
ရတယ်။ဖြစ်လာပြီးမှတော့ရလာတဲ့အခွင့်အရေးလက်လွှတ်မခံဘဲဆက်လျှောက်ဖို့သာရှိတော့တယ်ဆိုတဲ့
စိတ်ကူးနဲ့ရုရှားဘာသာစကားသင်ပြီးနောက်ဆုံးမှာသရုပ်ပြရာထူးခန့်ပြီးမဟာသိပ္ပံဘွဲ့ဆက်တက်ဆို့ရုရှားနိုင်ငံ
မော်စကိုမြို့ကို၂၀၀၈ခုနှစ်စက်တက်ဘာလ(၉)ရက်နေ့မှာစေလွှတ်ခဲ့တယ်။

ကျောင်းသားဘ၀မှဆရာဘ၀ကူးပြောင်းခါစဆိုတော့ကိုယ့်ကိုကိုယ်ဆရာတစ်ယောက်လို့ချက်ချင်းခံယူလို့
မရသေးပေမဲ့ဌာနကိုပြန်ရောက်တော့မဟာတန်းအတန်းတူသူငယ်ချင်းတွေကိုဆရာမတွေကကျနော်တို့ကို
ဆရာခေါ်ခိုင်းဖို့ပြောတော့သူငယ်ချင်းတွေကြားထဲမှာဆရာလို့အခေါ်ခံရတာကိုရှက်မိသေးတယ်။

သရုပ်ပြလုပ်သက် (၇) နှစ်မှာရာထူးတိုးတင်ခိုင်းလို့တင်၊တကယ်တမ်းရာထူးတိုးထွက်တော့ကျနော်တို့အဖွဲ့
မပါ။ဒီလိုနဲ့အမျိုးမျိုးသောလူပြောင်းမူပြောင်းတွေကြားထဲမှာရာထူးတိုး(၅)ကြိမ်တင်ပြီးလုပ်သက် (၈)နှစ်ကျော်
ကျော်အကူးအပြောင်းကာလမှာမျှော်လင့်ခဲ့ရတဲ့ရာထူးတိုးကမထင်မှတ်တဲ့အချိန်မှာဆိုက်ဆိုက်မြိုက်မြိုက်
ထွက်လာခဲ့တယ်။

တကယ်တမ်းတရားဝင်ရာထူးတိုးအမိန့်ကြေငြာစာထွက်တာကတော့ ၂၀၁၅ ခုနှစ် ဒီဇင်ဘာလ (၃) ရက်နေ့
မှာကျနော်တို့ ၂၀၀၇ ခုနှစ်ခန့် ရူပဗေဒ၊ဓာတုဗေဒနဲ့သချာင်္ကနည်းပြသရုပ်ပြဆရာများလက်ထောက်ကထိက
ရာထူးတိုးမြှင့်လိုက်ကြောင်းအမိန့်ကြေငြာစာထွက်ခဲ့ပါတယ်။

ကံကောင်းတာတစ်ခုကအရင်ကစနစ်အတိုင်းမဟုတ်ဘဲမိမိလက်ရှိတာဝန်ထမ်းဆောင်ရာတက္ကသိုလ်မှာပဲ
ရာထူးတိုးကြခြင်းပါ။ပုံမှန်အတိုင်းဆိုရာထူးတိုးတင်တာနဲ့တခြားကျောင်းကိုပြောင်းရွှေ့ရတာမို့လျှောက်လွှာ
တင်စဉ်ကတည်းကဦးစားပေးတက္ကသိုလ်ထည့်ရေးပြီးတင်ခိုင်းသော်လည်းဒီတစ်ခါတော့ကျနော်တို့အဖွဲ့တွေ
မိခင်တက္ကသိုလ်မှာပဲရာထူးတိုးရကြတယ်။ကိုယ့်အိမ်ကိုယ့်ယာလိုဖြစ်နေတဲ့နေရာမှာဆက်ပြီးတာဝန်ထမ်း
ရမှာမို့ပျော်ရွှင်မိသော်လည်းအဖေအမေနဲ့နီးတဲ့ကျောင်းကိုမရောက်တော့စိတ်မကောင်းဖြစ်မိတယ်။

နောက်ဆုံးတော့အချိန်ကာကတွေတစ်ရွေ့ရွေ့ပြောင်းလဲလာခဲ့တာသူငယ်တန်းအလယ်တန်းအထက်တန်း
တက္ကသိုလ်ကျောင်းသားဘ၀မှသည်တက္ကသိုလ်ဆရာပေါက်စကနေအခုတဆင့်တက်လက်ထောက်ကထိက
ရာထူးလေးအထိရောက်ရှိလာခဲ့ပါပြီ။နောက်ထပ်အဆင့်တွေကိုတက်ဖို့ကြိုးစားရုန်းကန်ရင်းနဲ့တတ်ထားသမျှ
လေ့လာထားသမျှပညာတွေကိုအနာဂတ်လူငယ်တွေဆီပြန်လည်မျှဝေရင်းနိုင်ငံအတွက်တစ်ထောင့်တစ်နေ
ရာကနေတတ်စွမ်းသမျှနဲ့ပါဝင်လုပ်ဆောင်သွားဖို့တွေးရင်းပြောင်းလဲလာတော့မည့်အနာဂတ်မြန်မာပြည်ကြီး
ကိုစိတ်ကူးနဲ့မြင်ယောင်ကြည့်နေမိပါတယ်။

အားလုံးကိုယ်စိတ်နှစ်ဖြာကျန်းမာချမ်းသာကြပါစေဗျာ။လာလည်ကြတဲ့အတွက်လည်းကျေးဇူးတင်ပါတယ်။

ဘယ်လိုရာထူးဂုဏ်သိမ်တွေပဲပိုင်ဆိုင်ခဲ့ပါစေ၊ကျနော်ရဲ့စိတ်ထွက်ပေါက်ပေးတဲ့နေရာ၊ကျနော်ရဲ့ဝါသနာလေး
တွေဖော်ပြခွင့်ရတဲ့နေရာဖြစ်တဲ့ဒီဘလော့စာမျက်နှာလေးနဲ့လူချင်းအပြင်မှာမတွေ့ဖူးသော်ငြားဒီနေရာလေးမှ
ခင်မင်ခွင့်ရတဲ့ကျနော့်မိတ်ဆွေညီအစ်ကိုမောင်နှမများအတွက်ဒီနေရာလေးကကျနော့်ရင်ထဲမှာအမြဲတမ်း
ရှင်သန်ရပ်တည်နေမှာပါ။

အားပေးမှုကိုအစဉ်လေးစားလျက်

ရွှေညာသားလေး