ဗူးသီးနဲ့ပင်လယ်စာ

တနေ့က ချက်စားဖြစ်တဲ့ ဟင်းတစ်ခွက်ပါ။ ပင်လယ်စာ မစားဖူးလို့ ၀ယ်စားကြည့်တာ သိပ်မဆိုးပါဘူး။ စားလို့ကောင်းပါတယ်။ တစ်ခါမှ မချက်စားဖူးတော့ ဘယ်လိုချက်စားရမှန်း မသိလို့ စိတ်ထင်ရာ ချက်လိုက်ပါတယ်။ ရေခဲရိုက်ပြီးသား ၀ယ်ရတာမို့ အထဲမှာပါတာလေးတွေက တုံးပြီးတစ်ပြီးသားတွေပါ။ အားလုံးကိုတော့ နာမည်မခေါ်တတ်ဘူး။ မြင်ဖူးတာလေးတွေကတော့ ပုစွန်၊ ရေဘ၀ဲ၊ ဂုံး(ယောက်သွားလို့လည်းခေါ်တယ်ထင်တယ်)၊ အကောင်မမြင်ဖူးတဲ့ ဖြူတူတူ အပိုင်းလေးတွေလည်း ပါသေးတယ်။ ရေဘ၀ဲကိုတော့ အကောင်မြင်တာနဲ့ လူက တွန့်ချင်တယ်။ စားလည်းမစားရဲဘူး။ စားမယ်ကြံရင် ရေဘ၀ဲကောင်ကို ပြေးပြေး မြင်လို့ပါ။ ဂုံး ကိုတော့ ငယ်ငယ်တုန်းက စားဖူးတယ်။ ကယားပြည်နယ်က ဘီလူးချောင်းနားမှာ နေခဲ့ဖူးလို့ပါ။ ဘီလူးချောင်းထဲမှာက ဂုံး တွေ အတော်ပေါတယ်။ ကျန်တာတွေကိုတော့ ဒီတစ်ခါ ပထမဆုံး စားဖူးတာပါပဲ။ စားဖူးတယ် ဆိုရုံပဲ ဗူးသီးဖတ်ကိုပဲ များများရွေးစားတယ်။

 တစ်မျိုးတည်းချက်တာမို့ နယ်စားလို့ရအောင် အရည်လေးနဲ့ ချက်ထားပါတယ်။

ချက်တာကတော့ ရိုးရိုးလေးပါပဲ။ အရင်ဆုံး ကြက်သွန်၊ခရမ်းချဉ်သီး၊ ဆား၊နနွင်း၊ငံပြာရည် စတာတွေကို စုံအောင်ထည့်ပြီး ဆီသတ်ပါတယ်။ ဆီသတ်ပြီးတော့ ငရုတ်သီး၊ ကြက်သွန်ဖြူ၊ ချင်း(ဂျင်း) ရောထောင်းထားတာကို ထည့်ပြီး မွှေးလာအောင် ခဏထားပါတယ်။ အဲ့ဒါပြီးတော့ အစောကပြောတဲ့ ပင်လယ်စာ အရောအနှောကို ထည့်ပြီး လုံးပါတယ်။ ခဏကြာတော့ ရေသင့်ရုံထည့်ပြီး ဆူပွက်သည်အထိ တည်ထားလိုက်ပါတယ်။ ဟင်းအိုးပွက်တော့မှ ဗူးသီးကို မထူးမပါးလေး လှီးပြီးထည့်လိုက်ပါတယ်။ ဗူးသီးကျက်တော့ အရသာအပေါ့အငန်မြည်း နံနံပင်လေးအုပ်ပြီး မီးဖိုပေါ်မှချလိုက်ပါတယ်။ အဲ့ဒါဆိုရင်တော့ ငရုတ်သီးစပ်စပ်လေးနဲ့ မပျစ်မကျဲ ဗူးသီးပင်လယ်စာ ဟင်းတစ်ခွက် စားရန်အဆင်သင့်ရပါပြီ။

ငရုတ်သီးစပ်စပ်လေးနဲ့ ထမင်းမြိန်စေမယ့် ဗူးသီးပင်လယ်စာ ဟင်းတစ်ခွက်ပါ

ဖြူဖြူလေးနဲ့ ပဲစေ့လိုလို ဟာလေးက ဂုံး လို့ထင်တာပဲ။ ဟုတ်လားတော့ မသိဘူး။ နံနံပင်အစား ပင်စိမ်းတို့၊ ရှမ်းနံနံတို့ ထည့်ရင်လည်း စားကောင်းမယ် ထင်ပါတယ်။ 

လာလည်ကြရင်း သုံးဆောင်သွားကြအုံးဗျာ...ဒါမျိုးဟင်းက အညာမှာတော့ မစားရနိုင်ပါဘူး....။