မုန့်ညှင်းပေါင်းနဲ့အညာခရမ်းချဉ်သီးထောင်း

အချက်အပြုတ်ဝါသနာပါတဲ့ ကျနော်အညာသား အလုပ်များပျားတုပ်နေတဲ့ကြားက တခါတခါအချိန်လုပြီး
ထမင်းဟင်းချက်စားဖြစ်သေးတယ်။ကျောင်းထဲမှာတစ်ရက်ခြားညနေပိုင်းရောင်းတဲ့ဈေးလေးမှာအသီးအရွက်တွေတွေ့ရင်သဘောကျတဲ့အခါဝယ်ထားပြီးချက်မစားဖြစ်ပေမဲ့ကျောင်းကရေခဲသေတ္တာထဲမှာထည့်သိမ်းထား။
ညနေပိုင်းစောပြန်ဖြစ်တဲ့နေ့ဆိုရေခဲသေတ္တာထဲကထုတ်သွားပြီးစိတ်ကြိုက်ချက်စား။ရောက်ခါစကထိုင်းစာတွေကြိုက်တယ်ပေါ့ချက်စားစရာမလိုဘူးဆိုပြီးကျေနပ်နေတာ။အခုနှစ်နဲ့ချီပြီးစားလာတော့ပါးစပ်ကငြီးငွေ့လာတယ်။ထမင်းစားနားချိန်ဆိုင်ကိုသွားပြီးဆိုင်ရောက်ခါမှစားချင်စိတ်မရှိလို့ပြန်ခဲ့ရတာလည်းအခါခါ။
ဒါကြောင့်တခါတလေတော့မအားတဲ့ကြားကဖြစ်အောင်ချက်စားတယ်။

ဒါက ပထမ တစ်အိုးကျက်ခါစမှာ ပူပူလေးမြည်းတာ ငရုတ်သီးစိမ်းစပ်စပ်လေးနဲ့စားလို့ကောင်း

ဒီဇင်ဘာလထဲတုန်းကမြန်မာပြည်အလည်ပြန်တဲ့ညီမတစ်ယောက်ကိုငါးပုတ်ခြောက်တစ်ဗူးနဲ့လဘက်ပဲကြော် တစ်ထုပ်စီမှာလိုက်တာ။ငါးခြောက်က ၆၅၀၀ လဘက်က ၂၅၀၀ နှစ်မျိုးပေါင်း မြန်မာငွေ ၉၀၀၀ ကျတယ်တဲ့။
ထိုင်းဘတ်နဲ့တွက့်ပြီး ၁၈၀ ပေးလိုက်တယ်။စားချင်တာလေးတကုတကသယ်လာပေးလို့ကျေးဇူးတင်ရတယ်။
အဲ့ဒီငါးခြောက်မကုန်ခင်လေးသူနဲ့တွဲစားဖို့ဟင်းဘက်စဉ်းစားရင်းခရမ်းချဉ်သီးထောင်းစားဖို့သတိရတာနဲ့
ခရမ်းချဉ်သီးအသေးလေးတွေဝယ်ပြီးကျောင်းမှာသိမ်းထား၊ဒီနေ့ညနေဌာနကအစောပြန်လာပြီးချက်စားဖြစ်
တယ်။အခါတိုင်းသူများတွေကကိုယ့်ကိုနှုတ်ဆက်ပြီးတစ်ယောက်ပြီးတစ်ယောက်ပြန်ကြတာကိုယ်ကည ၁၁ ဆိုတာအစောဆုံးပြန်ရတာမို့ ဒီနေ့တော့သူတို့ကိုအရင်ဆုံးနှုတ်ဆက်ပြီးပြန်ခဲ့တယ်။အစောပြန်နေကျမဟုတ်
တော့ပစ္စည်းသိမ်းပြီးနှုတ်ဆက်ရမှာချီတုံချတုံနဲ့အသစ်ရောက်တဲ့ဘူတန်ကကျောင်းသူကိုငါအစောပြန်ရမှာ
ရှက်တယ်လို့စနေသေးတယ်။နောက်တော့အားလုံးကိုလက်ပြပြီးအခန်းထဲကမြန်မြန်ထွက်လာခဲ့တယ်။
အလင်းရောင်ရှိတုန်းပြန်နေကျမဟုတ်တော့စိတ်ထဲမလုံတလုံဖြစ်နေသေးတယ်။

ခရမ်ချဉ်သီး၊ငရုတ်သီးစိမ်းနဲ့နံနံပင်ရောထောင်းထားတဲ့ အညာခရမ်းချဉ်သီးထောင်းမွှေးမွှေးစပ်စပ်

ဒုတိယ တစ်အိုးက အအေးခံထားပြီးသားမို့ မုန့်သားကမာမာလေး

မုန့်ညှင်းပေါင်းကို ခရမ်းချဉ်သီးထောင်းနဲ့ရောပြီးစားတာ

အဆောင်ရောက်တော့လည်းတစ်မျိုးကြီးခံစားရတယ်။အခါတိုင်းကိုယ်ရောက်တဲ့အချိန်ဆိုဝင်ပေါက်စောင့်တဲ့
လုံခြုံရေးတွေတောင်အိပ်နေကြပြီ။ဒီနေ့တော့စောစောစီးစီးပါလားဆိုတဲ့အကြည့်နဲ့သူတို့လည်းသတိထားမိ
တယ်ထင်ရဲ့။အခန်းရောက်တော့အဝတ်လဲပြီးချက်ပြုတ်ခြင်းလုပ်ငန်းစပါတယ်။ချက်ရပြုတ်ရမယ်ဆိုမောရမှန်းမသိဘူး။ချက်ပြုတ်ရင်းနဲ့အမောဖြေတာပေါ့။ပထမတစ်မျိုးကမုန်လာဖူးကိုကြော်ဖို့စဉ်းစားရင်းကနေ
မုန့်ညှင်းပေါင်းလုပ်ဖို့စိတ်ကူးပြောင်းပြီးရှိပြီးသားပြောင်းဖူးမှုန့်နဲ့ပဲမှုန့်နည်းနည်းကျန်တာကိုရောကြက်သွန်ဖြူ
ဂျင်း၊ဆား၊ဆီအနည်းငယ်နဲ့ကြက်သားမှုန့်ထည့်ပြီးသမအောင်နယ်၊အမှုန့်နဲ့မုန့်ညှင်းရွက်တွဲကပ်ရုံရေထည့်ပြီးထပ်နယ်၊ပေါင်းအိုးမရှိတော့ဒယ်အိုးနီထဲကိုကြွေပန်းကန်အသေးအောက်ကထားအပေါ်ကကြွေပန်းကန်ပြား
တင်နယ်ထားတဲ့အမှုန့်နဲ့ရောနယ်ထားတဲ့မုန့်ညှင်းကိုငှက်ပျောဖက်အစားအလူမီနီယံဖွိုင်ကိုအပိုင်းလေးတွေ
ဖြတ်ပြီးထုပ်၊အိုးထဲကပန်းကန်ပြားပေါ်တင်ပြီးရေဆူအောင်တည်။တခါမှမလုပ်ဖူးတော့လုပ်သာလုပ်ရတယ်
ရင်တမမနဲ့အဆင်မှပြေပါ့မလားမဖြစ်ရင်တော့ကျန်တာကိုအကြော်ကြော်စားမယ်ဆိုပြီးစဉ်းစားနေတာ၊
၅ မိနစ်လောက်ထားပြီးအဖုံးဖွင့်အပေါ်ကတထုပ်ကိုအသာလှပ်ကြည့်တော့ကျက်စပြုနေတာနဲ့ဝမ်းသာအားရ
အဖုံးပြန်ပိတ်ပြီးနောက်ထပ်၅မိနစ်လောက်ထပ်တည်။မီးပိတ်ပြီးတစ်ထုပ်ကိုအရင်စမ်းကြည့်တော့အရသာ
မုန့်အနေအထားအိုကေမှစိုပြေတာနဲ့ကျန်တာကိုနောက်တကျော့ထပ်ပေါင်း။ပထမတစ်ပေါင်းကလေးထုပ်ကို
အိုးထဲကဆယ်ပြီးချင်းမြည်းတာနှစ်ထုပ်ကုန်တယ်။မထင်ဘဲထလုပ်လိုက်တာကအဆင်ပြေပြေနဲ့စားလို့ကောင်းလိုက်တာမပြောပါနဲ့။ကျောင်းမှာကတည်းကဗိုက်ဆာလာတာလည်းပါတာပေါ့။

ဒုတိယတစ်ပေါင်းကျက်တော့မှခရမ်းချဉ်သီးပြုတ်အအေးခံထားခဲ့ပြီးရေကူးချင်စိတ်ပေါက်တာနဲ့တစ်နာရီ
လောက်ရေသွားကူးလိုက်တယ်။ရေကူးကအပြန်ခရမ်းချဉ်သီးကိုငရုတ်သီးစိမ်းရယ်နံနံပင်ရယ်၊ကြက်သွန်ဖြူ
တစ်လုံးရယ်ရောပြီးထောင်း။အနံ့ရတော့ရွာတုန်းကအိမ်မှာအမေထောင်းကျွေးနဲ့ခရမ်းချဉ်သီးထောင်းကိုသတိရလိုက်သေးတယ်။နံနံပင်ကိုတခါထဲရောပြီးထောင်းတာကပိုမွှေးတယ်။အဖွားတို့တဲကိုသွားတဲ့အခါလည်း
အဖွားကခရမ်းချဉ်သီးလတ်လတ်ဆတ်ဆတ်ကိုအခင်းထဲကခူးမီးခဲပေါ်တင်ငရုတ်သီးစိမ်းအပင်ကဆွဲဆွတ်
ကိုင်းခင်းထဲကနံနံပင်ဆမြိတ်ပိတ်နှုတ်ပြီးခရမ်းချဉ်သီးထောင်ကျွေးတာထမင်းစားလို့အလွန်ကောင်းပေါ့။
ခရမ်းချဉ်သီးထောင်းရင်းငယ်ငယ်ကစားခဲ့ဖူးတာကိုသတိရတော့ဗိုက်ကပိုဆာသလိုထင်ရတယ်။
အားလုံးပြီးတော့အဆောင်အောက်ဆင်းထမင်းတထုပ်ဝယ်ပြီးခရမ်းချဉ်သီးထောင်းရယ်၊ငါးခြောက်ဖုတ်ရယ်
မုန့်ညှင်းပေါင်းရယ်တွဲဖက်ပြီးရေနွေးတခွက်နဲ့ညစာစားတာတကယ့်ကိုမမေ့နိုင်တဲ့ထမင်းတနပ်ပါ။

အညာခရမ်းချဉ်သီးထောင်း ဆီဆမ်းရင် အရသာပျက်လို့ ခရမ်းချဉ်သီးထောင်းရင် ဆီမဆမ်းပါဘူး

ဒါက အရင်တရက်ကျော်က နံနံပင်မပါဘဲ ငရုတ်သီးစိမ်းကြက်သွန်ဖြူနဲ့ထောင်းထားတာ

ခရမ်းချဉ်သီးထောင်းရင်ငါးပိကောင်သို့မဟုတ်ငါးခြောက်မီးဖုတ်ကိုဆီဆမ်ပြီးတွဲစားရတာအလွန်လိုက်ဖက်တဲ့
ဟင်းစပ်ပါ။အိမ်တုန်းကတော့ငါးပိကောင်မပါဘဲညတုန်းကကျန်တဲ့ထမင်းကြမ်းခဲနဲ့ခရမ်းချဉ်သီးထောင်းကို
မနက်အစောမှာတွဲစားရတာခဏခဏပါ။အဲ့ဒီလိုမစားရတာနှစ်နဲ့ချီကြာပြီးအခုမှပြန်စားရတော့ထမင်းမြိန်လိုက်တာမပြောပါနဲ့။စားနေရင်းနဲ့ အိမ်ကိုလည်းသတိရတယ် ငယ်ဘဝကိုလည်းသတိရတယ် ရွာကိုလည်းလွမ်းတယ်။ဒီတခါပြီးရင်တော့ နောက်ထပ်ပညာသင်ထွက်ဖို့ မစဉ်းစားတော့ပါဘူး။ အားလုံးလာလည်ကြရင်းနဲ့ အမောပြေနိုင်ကြပါစေဗျ။ဗိုက်ဆာသွားရင်လည်းခွင့်လွတ်ပါ။တကယ်မြည်းစမ်းကြည့်စေချင်သော်လည်း
လိုင်ပေါ်မှာဆိုတော့အဆင်မပြေနိုင်လို့ခွင့်လွတ်ပါ။ဆိုင်ဖွင့်တဲ့အခါလာအားပေးကြပေါ့ း)


လာလည်ကြတဲ့အွန်လိုင်းမိတ်ဆွေညီအစ်ကိုမောင်နှမများကိုယ်စိတ်နှစ်ဖြာကျန်းမာချမ်းသာပြီး
ပျော်ရွှင်ဖွယ်ရာ ၂၀၂၀ ပြည့်နှစ်ဖြစ်ပါစေလို့ ကျနော်ရွှေညာသားက ဆုတောင်းမေတ္တာပို့သပါတယ်။

အားပေးမှုကိုအစဉ်လေးစားလျက်

ရွှေညာသား

၁၃၈၁ ခုနှစ် ပြာသိုလ်လပြည့်ကျော် ၇ ရက်

၂၀၂၀ ခုနှစ် ဇန်နဝါရီလ ၁၇ ရက်