တလောတုန်းက အညာသားမြန်မာစျေးဘက်ကိုရောက်တော့ အညာဂွေးသီးအနုလေးတွေတွေ့လို့၁၅ဘတ်ဖိုးဝယ်လာခဲ့တယ်။
သူတို့တွေဘယ်လိုစားလဲသေချာမသိပေမဲ့သတိထားမိသလောက်တချို့ဆိုင်တွေကသင်္ဘောသီးထောင်းထဲမှာ
အညာဂွေးသီးအမှည့်တွေထည့်ပေးတာမြင်ဖူးတယ်။အစိမ်းကိုတော့တော်တော်များများဟင်းတွေမှာမတွေ့မိပါဘူး။
အရွက်နုကိုတော့ထမင်းဆိုင်တွေမှာတို့စရာအဖြစ်နဲ့မကြာခဏစားရတယ်။ ကိုယ်တွေဆီမှာတော့အရွက်ကိုသိပ်မစားကြဘူး။
အသီးနုနုကိုပြုတ်ပြီးဒါမှမဟုတ် အစိမ်းလိုက် ငါးပိနဲ့ထောင်းစား၊အမှည့်ဆိုလည်းငါးပိမီးဖုတ်နဲ့
ငရုတ်သီးရောပြီးထောင်းစား၊နှမ်းလှော်ထောင်းနဲ့ဟင်းချက်တာစားဖူးတယ်။ဒီအသီးကမှည့်သွားရင်အသားသိပ်မရှိဘူး အစေ့ကတော်တော်ကြီးတယ်။ မြို့မှာအချဉ်ပေါင်းရောင်းတဲ့ဂွေးသီးကိုတော့ အညာမှာသင်္ဘောဂွေးသီးလို့ခေါ်ကြတယ်။သူကအသားပေါတယ်၊အရသာကချိုချဉ်လေး
အညာဂွေးသီးအရသာကဖန်ဖန်တွတွနဲ့မို့အငံနဲ့တွဲစားမှအဆင်ပြေတယ်။
အညာသားလက်ရာ အညာဂွေးသီးငါးပိချက်
ဂွေးသီးဝယ်လာပြီးတော့ဘာလုပ်စားရမှန်းမသိဘူး။သူနဲ့တွဲဖို့ငါးပိကလည်းမီးဖုတ်စရာမရှိတော့နောက်ဆုံးအသီးလေးတွေကို
ဓားနဲ့ပါးပါးလှီးပြီးခရမ်းချဉ်သီးတစ်လုံး၊ကြက်သွန်နီတစ်လုံးကိုဆားငံပြာရည်နနွင်စုံအောင်ထည့်ပြီးအနှစ်ရအောင်ချက်တယ်။
အဲ့ဒီအထဲကိုပါးပါးလှီးထားတဲ့ဂွေးသီးထည့်ပုစွန်ခြောက်နည်းနည်းရှိတာရေဆေးထည့်၊နောက်မြန်မာပြည်ပြန်တဲ့
ညီတစ်ယောက်ပေးထားတဲ့ပဲပုပ်ပြားကိုကပ်ကြေးနဲ့ညှပ်ထည့်ပြီးဒယ်အိုးကိုအဖုံးအုပ်မီးအေးအေးနဲ့ချက်၊အားလုံးကျက်တော့
ငရုတ်သီးစိမ်းတောင့်ကိုထက်ပိုင်းချိုးထည့်ရှမ်းနံနံအုပ်ပြီးအရည်မခန်းခင်လေးမှာမီးဖိုပေါ်ကချ။
ထမင်းတစ်ပန်းကန်နဲ့ကြက်သွန်နီတစ်လုံးအခွံခွာရေဆေးလေးစိတ်စိပ်ရေနွေးနဲ့ဂွေးသီးဟင်း နဲ့လွေးလိုက်တာစားလို့ကောင်းချက်တစ်ယောက်ထဲဆွေမျိုးကိုမေ့ရော။
အညာဂွေးသီး https://steemit.com/myanmar/@mamamyanmar/today-my-curry-ce268bfe0709b မှ ယူထားပါတယ်
သင်္ဘောဂွေးသီး http://www.lwinpyin.com/2017/04/ghway-thi-for-health.html
နောက်နေ့မှာရန်ကုန်သားနဲ့မတ္တရာဇာတိရန်ကုန်နေတဲ့စိုက်ပျိုးရေးကအစ်ကိုတစ်ယောက်ကိုကိုယ်တိုင်လက်စွမ်းပြထားတဲ့ ဂွေးသီးဟင်းကျွေးလိုက်တာစားကောင်းလို့ ထမင်းနဲ့စားပြီးကျန်တဲ့ဟင်းပါစကားပြောရင်း ရေနွေးနဲ့မြည်းတာပန်းကန်ပဲကျန်တယ်။စားဖိုမှူးတစ်ယောက်ရဲ့ပီတိ
ကိုယ်ချက်တာကိုကောင်းတယ်ဆိုတော့မှိုရတဲ့မျက်နှာနဲ့ပေါ့။ တကယ်လည်းစားကောင်းပါတယ်။သူတို့လည်းကိုယ့်လက်ရာတော်တော်များများ
စားဖူးတော့ကိုမျိုးလက်ရာဆိုစိတ်ချပြီးသားလို့ပြောကြတယ်။ရန်ကုန်သားကတော့ဟင်းချက်စားလို့ရတဲ့ အသီးအနှံတွေ့ရင်ခူးလာပေးတယ်။ကိုယ်ကလည်းချက်ရပြုတ်ရမယ်ဆိုနှစ်ခါမပြောရတော့အဆင်ပြေနေတာ။ ကျောင်းပိတ်တော့ထမင်းဆိုင်တွေကပိတ်ကိုယ့်အခန်းမှာပဲ ဖြစ်သလို
ချက်ပြုတ်စားကြရတော့ သူတို့ဟင်းစားရှာလာရင်ကိုယ်ကချက်ပေးပြီး စားကြတိုင်းရေးပြည်ရေးဆွေးနွေးကြနဲ့ပင်ပမ်းသမျှထမင်းစားရင်းအပန်းဖြေကြရတာ။ သူများတွေကျောင်းပိတ်ပေမဲ့ကိုယ်တွေအတွက်တော့နေ့တိုင်းဟာကျောင်းဖွင့်ရက်ပါပဲ။ အခုတော့အဲ့ဒီတုန်းကချက်ဖြစ်တဲ့
ဟင်းလေးတွေရော နောက်ပိုင်းချက်ဖြစ်တာလေးတွေရော စုပြီးတင်ပေးလိုက်ပါတယ်။ ဟင်းခွက်တွေအများကြီး တခါတည်းချက်စားတယ်လို့ မထင်ပါနဲ့ဗျ။ တစ်မျိုးမှ တပတ်လည်းဟုတ် တလလည်းဟုတ် ဆိုသလို မအားတဲ့ကြားက အငတ်မနေနိုင်လို့ ရတဲ့အချိန်ထဲကအပြေးအလွှားချက်စားဖြစ်တဲ့ဟင်းလေးတွေအမှတ်တရ သိမ်းထားတာပါ။
ဒါကမျှစ်ဆတ်ဟင်းအရည်သောက်
ညနေပိုင်းကျတော့ ကြက်သားနဲ့ရောထားတာ
ယုဇန ရှုးရှဲလဘက်ထုပ်ကို ခရမ်းချဉ်သီးဂေါ်ဖီကြက်သွန်နီတို့နဲ့ရောပြီးသုပ်ထားတာ
အဲ့ဒီနေ့ကလည်း ရေနွေးဝိုင်း ညဉ့်တော်တော်နက်သွားတယ်။
ဘရိုကိုလီ ကြော်
ကြာဇံကြော်
ကြက်သွန်နီသံပုရာရည်ဆမ်း နံနံပင်ငရုတ်သီးစိမ်း အချဉ်သုပ် ကြာဇံကြော်နဲ့တွဲဖက်
မျှစ်ဆတ်နဲ့ဖရုံရွက်ဟင်းချို အမေ့အိမ်ကိုသတိရလို့ ပါ
ပိန္နဲစေ့ပြုတ်ထားတာကိုအခွံနွှာပြီး ညက်အောင်ထောင်း ကြက်သွန်နီနဲ့ပြန်ကြော်ထားတာ ချိုဆိမ့်ဆိမ့်လေးနဲ့ အရမ်းအရသာရှိပါတယ်။
အိမ်မှာတုန်းက ပုပ္ပားနားကရွာတွေမှာပိန္နဲသီးပေါ်ချိန်ဆို အမေနဲ့သွားပြီး ပိန္နဲစေ့ကို ပြည်တောင်းနဲ့လိုက်ဝယ်အိမ်ရောက်တော့ မကောင်းတာတွေ ဖယ်ရှား ရေစင်အောင်ဆေးပြီးပြုတ် လက်ပံပျား တောင်ဦး စတဲ့ ၅ ရက် တပတ်ခင်းတဲ့စျေးမှာ နို့ဆီဗူးခွံနဲ့တစ်ဗူးဘယ်လောက်ဆိုပြီး ပြန်ရောင်းရတာ။ အဲ့ဒီကတည်းက ပိန္နဲစေ့ကိုပြုတ်ပြီးရင် ရောင်းပန်းမလှတဲ့အပဲအရွဲ့လေးတွေကို အခွံခွာ ငရုတ်ဆုံမှာစုထောင်းပြီး ကြက်သွန်နီများများကို ဒယ်အိုးမှာဆီပါတယ်ဆိုရုံနဲနွမ်းအောင်လှိမ့်ပြီးတော့ညက်အောင်ထောင်းထားတဲ့ပိန္နဲစေ့ကိုထည့် ဆားသင့်ရုံထည့်ပြီး ကြက်သွန်နဲ့နှံ့အောင်မွှေ ဆီနည်းနည်းပါတာဆိုတော့ ကြက်သွန်နဲ့ပိန္နဲစေ့ရောသွာရင်ဆီကမြင်ကိုမမြင်ရတော့ဘူး ဆီစိုစိုလေးနဲ့ကြော်ရင် ပိုပြီးစားလို့ကောင်းတယ်။ အဲ့ဒီဟင်းကြော်တဲ့နေ့က စိတ်ထဲမှာ ဝမ်းနည်းသလိုလိုကြီးခံစားရတယ်။ လွန်ခဲ့တဲ့ဆယ်နှစ်လောက်ကဖြတ်သန်းခဲ့ရတဲ့ဘဝကိုလည်းပြန်သတိရတယ်။အဲ့ဒီအချိန်တုန်းက ကျနော်တို့ညီအစ်ကိုတွေကို အမေပြောတဲ့စကားလေးကိုလည်း ပြန်ကြားမိတယ်။ ပိန္နဲစေ့ကြော်စားကောင်းချက် အမေကတော့ ကြက်ဥကြော်နဲ့တောင်မလဲနိုင်ဘူးတဲ့ အမေပြောသလိုပါပဲ တကယ်လည်း အရသာရှိတယ်။
ဘေးအခန်းကအစ်ကိုကတော့ အရင်ကတခါမှမစားဖူးဘူး အခုစားဖူးတော့ စားလို့ကောင်းလို့ ခဏခဏပြောနေသေးတယ်။ အဲ့ဒီဟင်းအကြောင်း အမေနဲ့ဖုန်းပြောရင်းသတိရလို့ ပြန်ပြောဖြစ်သေးတယ်။ ငယ်ငယ်တုန်းကအကြောင်းတွေလည်း သတိရတယ်အမေရယ်ဆိုတော့ဟုတ်ပါ့ အမေတောင် ပိန္နဲစေ့ကြော်မစားရတာကြာပြီတဲ့။
ဒါကတော့ တခါတရံ ကျောင်းကိုထည့်သွားတဲ့ ထမင်းဗူးပါ။ အဲ့ဒီနေ့က ကြက်ဟင်းခါးသီးကြော်နဲ့ ည ၁၂ နာရီလောက်မှ
ဌာနမှာတစ်ယောက်ထဲစားခဲ့ရတဲ့နေ့လယ်စာနဲ့ညစာ ပေါင်းစားရတယ်
ဒါကတော့ နေ့စဉ်စားနေကျ ကျောင်းကန်တင်းထမင်းဆိုင်က ထမင်းပွဲပါ။ အဲ့လိုဟင်းကိုပုံပေးတာ ဟင်းနှစ်မျိုးနဲ့ ၂၅ ဘတ်
အသားဟင်းတစ်မျိုးအသီးအရွက်တစ်မျိုး ငါးပိထောင်းတို့စရာပါတယ်။ အသားဟင်းတွေမစားချင်တော့လို့
မျှစ်နဲ့ခရမ်းသီးဝက်သားအုန်းနို့ရောချက်ထားတဲ့ဟင်းထဲကခရမ်းသီးနဲ့မျှစ်ကိုပဲထည့်ပေးခိုင်းတာ၊ အရည်ကိုတော့ စပ်လွန်းတဲ့ ငါးပိရည်ကျိုထဲကနည်းနည်းဆမ်းပေးတယ်။တို့စရာကတော့ စားသမျှအစိမ်းတွေချည်းပဲ။ ပဲစောင်းလျားသီးအစိမ်းတို့စားရတာကို သဘောကျနေပြီ ခရမ်းသီးလည်းအစိမ်းလိုက်တို့၊ ဒညင်းသီးလည်းအစိမ်းလိုက်တို့၊ ကြာနီရိုးလည်းအစိမ်းလိုက်တို့ တမာရွက်လည်းအစိမ်းလိုက်တို့ စားသမျှ အသီးအနှံတော်တော်များများအစိမ်းတိုင်းတို့စားတာများတယ်။
၇ ရက်သားသမီးအားလုံးနဲ့ လာလည်ကြတဲ့မိတ်ဆွေများကိုယ်စိတ်နှစ်ဖြာကျန်းမာချမ်းသာကြပါစေလို့ ကျနော်ရွှေညာသားကဆုတောင်းမေတ္တာပို့သပါတယ်ဗျာ။
အားပေးမှုကိုအစဉ်လေးစားလျက်
ရွှေညာသား
၁၂-၆-၂၀၁၉
